Forbundet KYSTEN sitt landstemne 2026
23-26. juli 2026 vert Strusshamn arena for landstemnet. Askøy kystlag er vertskap og har med seg Askøy kommune, Sjoddien – Strusshamn kultursenter og Fjell kystlag på laget.
Berre ein kort rotur nord for Bergen sentrum ligg Askøy. I sørenden av øya finn du Strusshamn, som i fleire hundre år var eit viktig knutepunkt for sjøtrafikk som karantenehamn, handelsstad, kyrkjestad, kommunesenter og industristad. Strusshamn er ei god hamn med fortøyningspålar, naust, sjøboder, kaiområder og ulike verksemdsbygg som vil gje landsstemnet ei svært autentisk ramme.
Gjennom fire dagar skal vår felles kystarv løftast fram, frivilig innsats skal feirast, kulturhistorie skal formidlast og vonleg skal nye generasjonar inspirerast til å ta til seg og ikkje minst vidareføra kunnskap og tradisjonar.
Eit hovudtema vert Framtidas kystkultur. Landstemnet inviterer difor til å drøfta korleis me kan føra kystkulturen vidare til komande generasjonar. Havet er eit ressursgrunnlag som dannar grunnlag for all næringsutvikling og etablering langs kysten. Denne ressursen er under press, men det kjem óg nye løysningar og nye næringar som vil setja sitt preg på framtidas kystkultur. Korleis innrettar me samspelet mellom tradisjon og ny teknologi?
Landsstemnet til Forbundet KYSTEN vil seie at det kjem eit tresifra tal båtar med mannskap frå heile kysten som skaper liv og røre i hamna. På ulike arenaer inne og ute, på land og på sjø, vil det bli eit rikt kulturprogram med konsertar av lokale aktørar kvar kveld. Tilgang til sjølve stemnet og alle kulturarrangementa er opne og gratis. Stemneprogrammet byr på eit variert program for alle aldersgrupper:
Båtar og båtliv: Tradisjonsbåtar, seglskuter, veteranbåter, elektrisk motor på båtar, tevlingar for årer og segl, opne båtar, turar og defileringar på sjøen
Handverk og historie: Båtbygging, seglmaking, tauarbeid, smedkunst og foredrag
Barn og unge: Ro- og fisketurar, tradisjonshandverk, kystleik og matlaging med sjømat
Mat og marknad: Lokale mattradisjoner, kafé, kystmat-marknad med salsbodar og utstillarar
Foredrag og seminar: Framtidas kystkultur, bærekraft, om plastbåten og lokal kulturhistorie
Kulturprogram: Konsertar, kunstutstillingar, lokalhistorisk film, samlingar og omvisingar
Overnatting: høve til overnatting i seglskuter og andre historiske båtar i hamna
Festmiddag: Laurdag kveld med prisutdeling med gjester og kulturinnslag
Landstemnet vil fremja kortreist og lokalprodusert mat, minimera avfall og leggje til rette for kjeldesortering. Det vil bli mobilisert for fleirkulturell deltaking i arrangementet, presentasjon av nye løysningar for sirkulærøkonomi og elektrisk framdrift i tradisjonsbåter.
Påmeldinga for deltakande båtar er opna på Askøy kystlag si heimeside Der vil du etter kvart finne meir detaljert informasjon om alle sider ved landsstemnet. Det er med andre ord berre å rydda plass i kalenderen og setja kursen mot Strusshamn. Landsstemnet er ein arena for nettverksbygging, kunnskapsdeling, maritime aktivitetar og eit av sumarens høgdepunkt for det kystkulturelle fellesskapet.
Tekst: Kjell Magnus Økland Teikning: Halvard Husefest Lunde